အာရှကျားကြီး ပြန်လာတော့မှာလား

အာရှကျားကြီးက တကယ်များ တဖန် ပြန်လည်လို့ နိုးထလာလေပြီလား။ ပြောဖို့တော့ စောနေပါသေး၏။ ခုမှ 1 ပွဲပဲ ရှိသေးတယ်မလား။ Asian Cup Qualification Playoff ပွဲစဉ် ဖြစ်၏။ Myanmar အသင်းက Group E မှာ Afghanistan, Syria, Pakistan အသင်းတို့နဲ့ တအုပ်စုထဲ ကျရောက်နေ၏။ Group E က အသင်းတွေကို မြင်တော့ တော်တော်များများက ဘောလုံးကန်ကြမှာလား။ ပစ်ကြ ခတ်ကြမှလားတွေ ပြောကုန်ကြ၏။ အင်းလေ ပြောလည်း ပြောချင်စရာ ဒီအုပ်စုထဲမှာ ရှိနေတဲ့ အသင်းတွေကလည်း ပြောချင်စရာပဲကိုး။

Myanmar အသင်းက အုပ်စု အဖွင့် ပွဲစဉ် အဖြစ် အိမ်ကွင်းမှာ Afghanistan အသင်းနဲ့ စတင် ကစားရ၏။ 2-1 ဖြင့် နိုင်၏။ ဒါတောင် Afghanistan က ဦးဆောင်ဂိုး အရင် သွင်း၏။ ကိုယ်တွေက နောက်က ပြန်လိုက်ကစားရတာ။ သန်းပိုင်က ချေပဂိုး၊ မောင်မောင်လွင်က အနိုင်ဂိုးတွေ သွင်းယူပေးပြီး အရှုံးကနေ သရေ၊ သရေကနေ အနိုင်ရလဒ်ရအောင် စွမ်းဆောင်ပေးခဲ့ခြင်း ဖြစ်၏။ နောက်ပွဲစဉ်တွေမှာ ဘယ်လို ဖြစ်လာမယ် မသိသေးပေမယ့် ယခုပွဲစဉ်မှာတော့ မဆိုးဟု ဆိုရပေလိမ့်မည်။

ခု Qualification က Round 3 ဖြစ်၏။ အုပ်စု တခုစီမှာ 4 သင်း၊ ထိုအထဲမှာမှ အုပ်စုပထမရသည့် တသင်းသာ နောက်တဆင့် တက်မယ် ဖြစ်၏။ အုပ်စု F ထိ ရှိတယ် ဆိုတော့ 6 သင်းသာ နောက်တဆင့် တက်မယ်ပေါ့။ အိမ်ကွင်း အဝေးကွင်း နှစ်ကျော့ ကစားရမှာမို့ 6 ပွဲကစားရမည် ဖြစ်၏။ အုပ်စု ပထမ ရယူနိုင်ဖို့ ပွဲစဉ်တိုင်းက အရေးကြီး၏။ သေချာ အာရုံစိုက် ကစားနိုင်ဖို့ လို၏။ Myanmar အသင်း အနေဖြင့် Major Tournament ပြိုင်ပွဲကြီးတွေမှာ ဝင်ရောက် ကစားနိုင်၊ ကစားခွင့် ရ မရကတော့ စိတ်ဝင်စားစရာပင်။

လက်ရှိ နိုင်ငံရေး အခြေအနေကြောင့် ခက်ခဲမှာတော့ အသေအချာပင်။ အချို့က အားကစားသည် နိုင်ငံရေးနှင့် မဆိုင်ဟု ဆိုကြ၏။ ရယ်ရ၏။ နိုင်ငံရေးသာ ကောင်းနေကြည့်ပါလား။ ခု မြန်မာ့လက်ရွေးစဉ်အသင်းရဲ့ အိမ်ကွင်းကြီးမှာ ပရိတ်သတ်တွေနဲ့ ပြည့်လျှံနေပေလိမ့်မည်။ နိုင်ငံတော် သီချင်းကို သံပြိုင်ဆိုပြီး အားပါးတရ အားပေးနေမယ့် လူအုပ်ကြီးကို မြင်ရမည်မှာ မလွဲပေ။ ခုတော့ လူလေးအနည်းငယ်သာ ဟိုတစု၊ ဒီတစုနဲ့။ လူတစု၏ အာဏာရူးမှုက လူအားလုံးကို ဒုက္ခ အခက်အခဲတွေ အများကြီး တွေ့ကြုံခံစားရစေ၏။ အားကစား မပြောနဲ့ ပညာရေး၊ ကျန်းမာရေး၊ စီးပွားရေး အဘက်ဘက်မှာ နိမ့်ကျ ပျက်စီးသွားရ၏။

ဘယ်လိုပင် အခြေအနေဆိုးဆိုး ယခင်လောက်၊ ယခင်လို အားမပေးဘူး ဆိုပေမယ့်လည်း အသံလေး ကြားရင်တော့ နားစွန် နေမိ၏။ ဘယ်လိုများ ကစားမလဲ၊ ဘယ်လိုများ ဖြစ်သွားပြီလဲပေါ့။ ခေတ်သာကောင်းနေရင် ဒီအချိန်ဆို အရှေ့တောင်အာရှ မပြောနဲ့ အာရှ အဆင့်မှာပါ အနေအထားတခုရှိမည့် တိုင်းပြည် နိုင်ငံ ဖြစ်နေလောက်ပြီ။ ပြည်သူတွေ ကိုယ်တိုင် ရွေးချယ်ထားတဲ့ ပြည်သူ့ အစိုးရ၏ ဦးဆောင်မှုနဲ့ပေါ့။

(photos from MFF page)