Missing Persons | مسنگ پرسنز

مسنگ پرسنز یعنی کہ گمشدہ افراد، ایک ایسا عالمی مسئلہ ہے کہ ہر گزرتے دن کے ساتھ اس کے کیسز بڑھتے چلے جا رہے ہیں. ذرا تصور کیجیے کہ ایک ہنستے کھیلتے خاندان کا واحد کفیل، یا اس خاندان کا کوئی اہم فرد، کوئی بڑا یا چھوٹا ہی سہی، اچانک غائب ہو جاتا ہے تو لواحقین پر کیا بیتتی ہے؟ ظاہر ہے اگر کسی گھر کا واحد کفیل اچانک غائب ہوجاتا ہے تو ان کا کاروبار زندگی بھی یکدم رک جائے گا، اور وہ شدید مشکلات سے دو چار ہو جائیں گے. اسی طرح اگر کوئی چھوٹا بڑا یا بالخصوص کوئی لڑکی یا خاتون خانہ غائب ہو جائے تو یہ خبر بھی اس خاندان کے لیے کسی قیامت سے کم نہیں ہوتی. اس بات میں کوئی دو رائے نہیں کہ یہ ایک عالمی مسئلہ ہے اور اس کا واضح طور پر تدارک کیا جانا چاہیے. اس مسئلے کا کوئی ایسا مستقل حل نکالا جائے کہ جس سے اس مسئلہ کا باب ہمیشہ کے لیے بند ہو جائے. یہاں یہ بات بھی آپ کے ملحوظ خاطر رہنی چاہیے کہ مسنگ پرسنز سے میری مراد جبری گمشدگی، یا پھر کسی عاقل بالغ شخص کا گھر سے بغیر اطلاع کے غائب ہو جانا ہے. بچوں کا اغواء بھی یقیناً ایک بڑا المیہ ہے. اس پر ایک مستقل بلاگ لکھنے کی ضرورت ہوگی، اور میں مستقبل میں اس پر بھی ایک بلاگ لکھنے کا ارادہ رکھتا ہوں. ان شاء اللہ.

گمشدگی کی چند وجوہات:

اب ہم آجاتے ہیں گمشدگی کی وجوہات پر، کہ اگر کسی گھر کا کوئی فرد اچانک غائب ہو جاتا ہے تو اس کے پیچھے بڑا محرک، یا سبب کیا بنتا ہے؟ یوں تو کسی شخص کے غائب ہونے کے پیچھے درجنوں وجوہات ہو سکتی ہیں. بعض لوگ تو اپنی محبت کے پیچھے گھر سے بھاگ جاتے ہیں. نوجوان لڑکی یا لڑکا اگر گھر سے سامان سمیت جاتے ہیں یا بغیر سامان کے بھی اپنی مرضی سے بھاگتے ہیں تو اس کے پیچھے یہ وجہ کارفرما ہوتی ہے. گھر والے بے چارے تھانے کچہریوں میں رپورٹ گمشدگی لکھوا رہے ہوتے ہیں اور بچے خرمستیوں میں مگن ہوتے ہیں. ایسے بھی کئی واقعات ہم نے دیکھے ہیں کہ بچے گھروں سے بھاگے مگر زیادہ عرصہ اکٹھے رہ نہیں سکے یا دھوکہ ہو گیا تو جھوٹی کہانی بنا کر ہفتہ دو ہفتہ بعد واپس آگئے. اور گھر والے بے چارے خوشی کے شادیانے بجانے لگے. محبت میں دھوکہ بھی عجب چیز ہے. اس پر مستقل بلاگ لکھی جائے تب ہی بات سمجھ میں آئے گی. یہ تو ہو گئی ایک وجہ یعنی کہ محبت. ایک دوسری اور بڑی وجہ نوجوانوں کے غائب ہونے کی گھر سے پڑنے والی ڈانٹ یا مار اور لڑائی جھگڑا ہوتا ہے. چونکہ تحمل اور صبر کا فقدان ہے اور معاشرہ میں سوچ ایسی بن چکی ہے جس نے بچوں کو باغی بنا دیا ہے تو وہ چھوٹی چھوٹی سی بات پر بھی ناراض ہو کر گھر چھوڑ کر نکل جاتے ہیں. اسی طرح شوہر اور بیوی یا گھر کے دیگر افراد میں بھی نوک جھونک کے نتیجے میں جذباتی ہو کر لوگ گھر سے چلے جاتے ہیں. بعض لوگ معاشی ذمہ داریوں یا گھر کے مشکل حالات اور سختی کی وجہ سے گھر چھوڑ دیتے ہیں. بعض لوگ عیش و تفریح کے لیے غائب ہو جاتے ہیں اور واپس آکر ڈرامہ کرتے ہیں. یہ تمام لوگ اپنی مرضی سے گھر چھوڑ کر جاتے ہیں، جبکہ گھر والے غم میں ہلکان ہوتے رہتے ہیں کہ ان کا لخت جگر کسی نے اغواء کر لیا ہے. البتہ چند ایسی وجوہات بھی ہیں جن کو مد نظر رکھنا بھی ضروری ہے کہ بسا اوقات انسانی سمگلنگ کے لیے بھی لوگوں کو اغواء کیا جاتا ہے. ہندوستان، پاکستان، بنگلہ دیش میں یہ غیر قانونی کاروبار بھی ماضی میں بہت زیادہ جاری رہا ہے، حتیٰ کہ آج بھی کسی حد تک ایسا ہو رہا ہے. اسی طرح بعض مواقع پر یہ بھی دیکھا گیا ہے کہ کسی شخص کی غلط ذہن سازی کرکے اسے دہشتگردی کے لیے ساتھ ملا لیا جاتا ہے. شہادت کے جھوٹے خواب دکھا کر اس کے ہاتھ معصوم لوگوں کے خون سے رنگے جاتے ہیں. ایک آخری وجہ جسے پاکستان میں ہم سب سے زیادہ سنتے ہیں وہ یہ کہ خفیہ ایجنسیاں کسی فرد کو دہشت گردی میں ملوث ہونے یا دہشت گردوں کی سہولت کاری کے شبہ یا ثبوت کی بنیاد پر اٹھا لیتی ہیں. پھر ان کا جسمانی ٹرائل کرکے ان سے راز اگلوانے کی کوشش کی جاتی ہے اور یہ سلسلہ مزید یونہی چلتا رہتا ہے.

عالمی تناظر میں پاکستانی صورتحال:

گمشدگی کی تفصیلات کا ذکر کرنے کے بعد اب میں اپنے اصل مقصد کی جانب آتا ہوں. میرا اس بلاگ سے بنیادی مقصد یہی تھا کہ اپنے ملک میں جبری گمشدگی کے نام پر پھیلی انارکی اور افراتفری کے انسداد پر لکھوں. جیسا کہ میں نے ذکر کیا کہ مسنگ پرسنز ایک عالمی مسئلہ ہے. جس سے معلوم ہوتا ہے کہ یہ مسئلہ صرف ملک پاکستان کا نہیں بلکہ دنیا بھر کے ممالک کا مشترکہ مسئلہ ہے. 2021 کی عالمی آبادیاتی تجزیہ کی رپورٹ سے یہ معلوم ہوتا ہے کہ اس وقت دنیا بھر میں سب سے زیادہ مسنگ پرسنز امریکہ میں پائے جاتے ہیں جن کی تعداد 2021 میں 5,21,705 تھی. اس کے بعد اگلا نمبر انڈیا کا آتا ہے جہاں 2021 کی رپورٹ کے مطابق ہر گھنٹے میں 88 افراد غائب ہوتے ہیں، ہر دن میں 2,130 افراد گمشدگی کی رپورٹوں میں آتے ہیں اور ہر ماہ تقریباً 64,851 افراد گمشدگی کی نذر ہوتے ہیں. اس کے بعد یوکے کی باری آتی ہے جہاں تقریباً ہر سال ایک لاکھ اسی ہزار افراد کھو جاتے ہیں. اس کے علاوہ کئی ایسے بڑے بڑے ممالک ہیں جہاں یہ تعداد حیرت انگیز طور پر بہت زیادہ ہے.

https://worldpopulationreview.com/country-rankings/missing-persons-statistics-by-country

ملک پاکستان کا نام ان گمشدگی کی لسٹوں میں تقریباً نہ ہونے کے برابر آتا ہے. لیکن اگر آپ فتنہ و فساد کا مشاہدہ کریں تو آپ کو اس میں پاکستان سرفہرست نظر آئے گا جہاں مسنگ پرسنز کی بنیاد پر پورے ملک میں افراتفری پھیلی ہوئی دکھائی دیتی ہے. پاکستان میں چند علاقے ایسے بھی ہیں جہاں کوئی بھی فرد غائب ہو چاہے وہ ناراض ہو کر از خود بھی جائے تو بھی ہمیشہ اس کی گمشدگی کی ذمہ داری پاکستان فوج اور اس سے متعلقہ اداروں پر ہی ڈالی جاتی ہے. خصوصاً اس حوالے سے پاکستان کا صوبہ بلوچستان بہت زیادہ خبروں میں دکھائی دیتا ہے جہاں ریاست سے گمشدہ افراد کے بارے میں جواب مانگنے کے لیے ہزاروں عورتیں، بچے اور مرد سڑکوں پر نکل کر ملک کا پہیہ جام کر دیتے ہیں. کبھی ملکی مفادات کو نقصان پہنچایا جاتا ہے تو کبھی املاک جلا دی جاتی ہیں. یعنی کھلم کھلا بغاوت کرکے ریاست کو چیلنج دیا جاتا ہے. اس سب کے باوجود بھی ریاست پاکستان جس کی فوج دنیا کی دس بہترین فوجوں میں سے ایک ہے. طاقت کے باوجود ان سے مصالحت کرتی دکھائی دیتی ہے. اگر گمشدہ افراد کی فہرست پر نظر دوڑائی جائے تو وہ یا تو کسی حادثے کی نذر ہو چکے ہوتے ہیں، یا پھر ملک دشمن عناصر کے ساتھ مل کر ملک میں فسادات برپا کر رہے ہوتے ہیں اور ان کے لواحقین ان کی گمشدگی کا حساب ریاست سے مانگتے ہیں. انہی گمشدہ افراد میں سے اکثر افراد دہشت گرد تنظیموں کا حصہ بن کر ملک کو نقصان پہنچا رہے ہیں. ہاں، یہ بات ضرور ہے کہ سب ایسا نہیں کر رہے. بعض معصوم بھی ایسے ہیں جو بلاوجہ قید و بند کی صعوبتیں برداشت کر رہے ہیں. جنہیں محض شک کی بنیاد پر اٹھا کر کئی کئی سال تک جسمانی ریمانڈ سے گزارا جاتا ہے. کسی خاندان کے ایک فرد کی دہشت گردی کے نتیجے میں اس خاندان کے بقیہ افراد بلاوجہ سزا بھگت رہے ہوتے ہیں. ایسے کئی بے قصور افراد اب بھی پابند سلاسل ہیں. ان کے لیے ضرور بالضرور آواز اٹھانی چاہیے. لیکن سوال یہ پیدا ہوتا ہے کہ آخر ان کے حق یا ناحق ہونے کا فیصلہ کون کر سکتا ہے؟

تدارک اور حل:

اوپر ذکر کی گئی تمہید کے نتیجے میں چند بنیادی باتیں ہمیں معلوم ہو گئیں. ایک تو یہ کہ تمام مسنگ پرسنز جبری گمشدگی کا شکار نہیں ہوتے. بلکہ مسنگ پرسنز کی کئی اقسام ہیں. ہر گمشدہ شخص ریاست کی وجہ سے غائب نہیں ہوتا. بلکہ کئی لوگ تو دہشت گرد عناصر کے ہتھے چڑھ کر ملکی سالمیت ہی کو نقصان پہنچا رہے ہوتے ہیں. دوسری بات یہ کہ اگر بالفرض ہم ریاستی جبری گمشدگی پر بھی بات کریں تو اٹھائے گئے افراد کی بے گناہی ہم کیسے ثابت کریں گے؟ اگر تو ہمارے پاس ان کے حق میں ثبوت موجود ہیں تو پھر ہمیں باقاعدہ کیس لڑ کر انہیں چھڑانا ہوگا. اداروں سے معلوم کرنا ہوگا کہ آیا یہ افراد ان کی تحویل میں ہیں یا کسی اور سبب سے غائب ہیں. تیسری بات یہ ہے کہ ہمیں ارد گرد موجود افراد کو یہ شعور دینا ہوگا کہ وہ کوئی بھی ایسا اقدام نہ اٹھائیں، ایسی صحبت اختیار نہ کریں جو انہیں مشکوک بنا دے، جس کے نتیجے میں انہیں مستقبل میں صعوبتیں اٹھانی پڑیں. اگر ہم ان باتوں کو مد نظر رکھتے ہوئے ملکی سلامتی اور مفاد کی خاطر کام کریں تو ریاست کیوں ہمارے ساتھ نہ ہوگی؟ ریاست کا تو کام ہے ہر شہری کی حفاظت کی ذمہ داری لینا. ہماری بھی ذمہ داری ہے کہ ہم مجرموں کو ریاست کے حوالے کریں. تاکہ ہمارا معاشرہ بھی ان سے آزاد ہو اور بقیہ بے گناہوں کی زندگیاں بھی خطرے میں نہ پڑیں. کیونکہ اسلحہ زور آور تو ہوتا ہے سمجھدار نہیں ہوتا. وہ حق و باطل کی تمییز کیے بغیر صرف مقرر کردہ ہدف کا خاتمہ کرتا ہے. ہم اپنی مضبوط ریاست کو خود کیوں کمزور کریں؟ اس کی اصلاح کرکے، تعاون کرکے اپنے گھر کی بنیادوں کو مضبوط کیوں نہ بنائیں؟

یاد رکھیں. ریاست کے نقصان میں ہمارا ہی نقصان ہے. ہم پاکستان سے ہیں اور پاکستان ہم سے ہے.

پاکستان زندہ باد.