ایک تاریخی مارکیٹ کا انہدام — لیکن کس قیمت پر؟

لاہور پاکستان سے خبر ہے کہ یہاں کی مشہور تاریخی "پرندہ مارکیٹ" گرا دی گئی ہے۔
کیسے۔۔۔؟
دراصل حکومتی اداروں کی طرف سے یہ علاقہ "تجاوزات" میں شمار کیا گیا تھا، اور "لہر منصوبے" کی زد میں آنے کی وجہ سے یہ اقدام کیا گیا۔

اس عمل پر ایک گہرا غور و فکر

قارئین کرام! تجزیہ نگار اور عوام و خواص جانتے ہیں کہ پنجاب حکومت عوامی مفاد میں مختلف کام کر رہی ہے اور اسی کے تسلسل میں اسے ایسے کڑوے بھی پینے پڑ رہے ہیں، بس اتنا ضرور ہے کہ جس رویے سے یہ عمل ہوا وہ ضرور قابل غور ہے۔
آئیے مل کر اس پر مختلف جہات سے کچھ غور کرتے ہیں، کیونکہ پرندہ مارکیٹ کی سرکاری طور پر مسماری کا یہ واقعہ محض ایک عمارت کے گرنے کا واقعہ نہیں بلکہ ہماری اجتماعی سوچ، ترجیحات اور حکمرانی کے اصولوں پر ایک سوالیہ نشان ہے۔

دیگر صوبوں کی بازگشت

اس سے پہلے بھی پنجاب کے مختلف علاقوں میں ایسے اقدامات ہوئے ہیں، اسی طرح صوبہ سندھ میں خاص کر حیدرآباد و کراچی کے باشندے اس تکلیف دہ عمل سے گزرے ہیں، ہم ان کے دکھ میں شریک ہو کر بھی انہیں حکومت سے ٹکراؤ کا مشورہ نہیں دیتے، ہم جانتے ہیں کہ انہوں نے لمحوں میں اپنی صدیوں کی جمع پونجی گنوائی ہے، لیکن پھر بھی ہم کسی کو تشدد کا راستہ اختیار کرنے کا نہ مشورہ دیتے ہیں اور نہ ہی قانون اس کی اجازت دیتا ہے۔

قانون اور اس کا اصل مقصد

ہم یہ بھی سمجھتے ہیں کہ انہیں ایسی جگہوں پر اپنے گھر و مکانات تعمیر کرنے سے پہلے قانونی مشورہ لینا چاہیے تھا، اور اس کی حیثیت کو واضح کرنا چاہیے تھا اور جب انہوں نے ایسا نہیں کیا تو گویا قانون کو نظر انداز کرنے کے اس جرمانے کے طور پر یہ مشکل ترین اور اذیت ناک حادثہ ان کے ساتھ پیش آیا۔۔۔
لیکن اس سارے منظر نامے کے پس منظر میں یہ بات بھی مدنظر رکھنی انتہائی ضروری ہے کہ قانون و حکومت کیا ہیں۔۔۔؟ ہمارے مطابق تو قانون کا مقصد صرف سزا دینا نہیں بلکہ انصاف پر مبنی ایک نظام قائم کرنا ہے اور اس کی بنیاد پر معاشرے کو منظم رکھنا ہے۔

عملدرآمد میں خامیاں

لیکن ہم نے مذکورہ واقعے کو جب چھان بین کی تو لگا کہ بعض متعلقہ اتھارٹیز کی صریح اور واضح غلطیاں بھی اس میں نظر آتی ہیں، بعض ایسے ناقص اقدامات، جن کی وجہ سے اچھا کام بھی برا بن جائے، خیر میں بھی شر ہی شر سما جائے،
مثلاً کیا لاہور کی پرندہ مارکیٹ کو یوں راتوں رات مسمار کرنا چاہیے تھا۔۔؟
کیا محض ایک نوٹس پہ اتنی بڑی کاروائی عمل میں لانی چاہیے تھی۔۔؟
بعض صحافیوں کے مطابق سینکڑوں پرندے اور بلیاں اس مسماری کے دوران ملبے تلے دب کر مر گئے، کیا یہ اخلاقی، انسانی اور قانونی لحاظ سے درست ہے۔۔؟

وعدے اور حقیقت

حکومت کا اعلان ہے کہ "لہر منصوبے" کی زد میں آنے والی عمارتوں اور جگہوں کے مالکان کو متبادل دیا جائے گا، کیا اس دعوے پر عمل ہوا یا یہ بھی فقط ایک حکومتی وعدہ یا زبانی جمع خرچ کی دفتری کاروائی اور فارمیلٹی ہی تھا، جس پر کبھی عمل نہ ہوگا۔۔۔؟

اگر یہ سب کام نہیں ہوئے، اور زمینی حقائق یہی بتا رہے ہیں کہ بالکل نہیں ہوئے تو معاف کیجئے گا ہمیں آپ کے منصوبوں سے ڈر لگتا ہے، جن کی بنیاد غریب کے خون اور ہڈیوں پر رکھی گئی ہو، ہمیں آپ کے اس خیر کے منصوبے سے شر ہی شر ٹپکتا نظر آتا ہے۔۔۔

ایک مارکیٹ جو خود ایک معیشت تھی

لاہور کی پرندہ مارکیٹ محض ایک بازار نہیں تھی بلکہ ایک مکمل ایکنامک ایکٹیو سسٹم تھی، کیونکہ یہ مارکیٹ دنیا کی بڑی مارکیٹوں میں شمار کی جاتی ہے، سینکڑوں افراد بلاواسطہ اور ہزاروں بالواسطہ اس سے جڑے ہیں، آپ نے بیک جنبش قلم ان ہزاروں افراد کو بے روزگار کر دیا۔۔۔
اب یہ کیا کریں گے۔۔؟
کیا یہ معیشت پر ناقابل تحمل بوجھ نہیں بنیں گے۔۔؟
کیا یہ تشدد کی راہ اختیار نہیں کریں گے۔۔؟
کیا یہ سب حکومت بیزار نہ بنیں گے۔۔؟
کیا یہ سب ملزم و مجرم بن کر اس خوشحالی کے لیے ڈراونا خواب نہیں بن جائیں گے جس کے سپنے ہم دن رات دیکھ رہے ہیں اور جن کا وعدہ آپ ہم سے صبح شام کر رہے ہیں۔۔۔؟

اعتدال اور ہمدردی کی اپیل

لہٰذا میرا دست بستہ مشورہ یہ ہے کہ ہمیں اعتدال کی راہ اپنانی چاہیے،
حسب وعدہ انہیں شفافیت کے ساتھ متبادل دینا چاہیے،
ان کی داد رسی کرنی چاہیے،
ہمیں اپنے تاریخی اور معاشی ورثے کا تحفظ کرنا چاہیے، ہمیشہ ترقیاتی منصوبوں میں تاریخی عمارتوں اور بازار کے تحفظ کو لازمی جزو بنانا چاہیے،
عوامی اعتماد حاصل کرنا چاہیے، جس کی ایک راہ یہ بھی ہو سکتی ہے کہ ہم اپنی مستقبل کی پالیسی واضح کریں کہ آئندہ ایسے ہنگامی سانحات نہیں ہوں گے،
اور جب تک ان تمام امور کا کوئی معقول انتظام نہ ہو جائے تب تک ایسی مسمار کنی سے بچنا چاہیے تاکہ ہم مل کر روشن مستقبل اور خوش گوار زندگی کی طرف قدم بڑھا سکیں اور میرا وطن عزیز دن دگنی رات چگنی ترقی کر سکے۔

یہ موضوع پاکستان میں سخت سنسر کیا جا رہا ہے۔
ملکی سطح کے بڑے ٹی وی نیوز چینلز — جیسے اے آر وائی نیوز، جیو نیوز اور دیگر لائسنس یافتہ نشریاتی ادارے، جو پاکستان میں بی بی سی یا سی این این کے مقامی ہم پلہ سمجھے جاتے ہیں — اس موضوع پر بالکل بھی بات نہیں کر رہے۔
صرف چند آزاد یوٹیوب چینلز اور چھوٹی آن لائن نیوز ویب سائٹس اس پر گفتگو کر رہی ہیں، لیکن مرکزی ٹی وی میڈیا جو آج بھی لاکھوں پاکستانیوں کے لیے خبروں کا بنیادی ذریعہ ہے، اس معاملے پر مکمل طور پر خاموش ہے۔

چند میڈیا اداروں، جیسے ڈان، نے اس واقعے کی رپورٹنگ تو کی،
مگر تفصیلات یا تو توڑ مروڑ کر پیش کی گئیں یا شدید طور پر سنسر کی گئیں۔
میں دنیا بھر کی جانوروں کے حقوق کی تنظیموں سے اپیل کرتا ہوں کہ وہ ان واقعات کی اصل حقیقت کی تحقیق کریں۔