Defense of the Thief [ENG-URDU]

عدالت کا منظر

عدالت میں عجیب منظر تھا، ایک نوجوان چور زیر حراست تھا، جس پر موبائل فون چوری کرنے کا الزام تھا۔

جج نے پوچھا:
"کیا تم قبول کرتے ہو کہ تم نے یہ جرم کیا ہے۔۔؟"

نوجوان نے جواب دیا:
"ہاں!!"

یوں ٹکا سا جواب سن کر جج بڑا سیخ پا ہوا کہ بڑے اڑیل ڈھیٹ ہو، چوری کرتے ہو پھر ذرا شرم نہیں آتی کہ اتنی ڈھٹائی سے جواب بھی دیتے ہو؟

وہ جوان ہنوز خاموش تھا۔

جج نے کہا:
"اوو مسٹر! کچھ بولو گے یا تمہیں کوئی کڑی سزا کا فیصلہ سنا دوں؟"

کڑی سزا کا لفظ سن کر وہ ملزم کانپ گیا، اب اس کے ہونٹ ہلے اور ڈرتے ڈرتے فقط اتنا بولا:
"صاحب میں نے دو دن سے کچھ نہیں کھایا تھا، میرے پاس کوئی کام نہیں تھا، گھر پہ میری ماں بھی بیمار تھی، اس لیے یہ غلطی ہو گئی۔۔۔"

یہ چار جملے نہیں تھے گویا ایٹم بم تھے جسے سن کر کمرہ عدالت میں یک دم سناٹا چھا گیا۔

وہیں کورٹ کے ایک وکیل نے کہا:
"سر یہ صرف چور نہیں یہ تو خود ظلم کا شکار ہے ہم نے اسے تعلیم نہیں دی، روزگار نہیں دیا، علاج نہیں دیا اور اب اگر ہم کچھ دینا بھی چاہ رہے ہیں تو وہ سزا ہے؟"

جرائم کی جڑیں

اس واقعے بلکہ سانحے کے بعد میں سوچ رہا تھا کہ کیا یہ نوجوان واقعی مجرم تھا یا یہ ہمارے ناکام نظام کا شکار پوری دیگ سے ایک دانہ۔۔۔؟

سچ تو یہ ہے کہ ہمارا معاشرہ ایک عجیب کشمکش میں جی رہا ہے، ہر طرف جرائم بڑھ رہے ہیں، ہمیں ان سے گھن تو ضرور آتی ہے مگر ساتھ ہی ساتھ ہم ان کی جڑوں کو پانی بھی دے رہے ہوتے ہیں۔

کیا آپ نے کبھی غور کیا ہے کہ جب ایک بچہ سڑک پر پیدا ہوتا ہے، غربت میں پلتا ہے، تعلیم سے محروم ہوتا ہے، اپنے والدین کو تڑپتا دیکھتا ہے تو اس کے اندر کیا جنم لیتا ہے؟ نفرت؟ حسد؟ مایوسی؟ یا بغاوت؟ یا یہ سب؟

اور جب یہ سب جمع ہو جائیں تو وہ کسی بھی انسان کو درندہ بنا سکتے ہیں۔

یاد رکھیے! ایک بھوکا پیٹ کبھی اخلاقیات نہیں سیکھ سکتا، ایک ننگا جسم کبھی شرم و حیا برقرار نہیں رکھ سکتا۔

سوال یہ پیدا ہوتا ہے کہ کیا جرائم خود پیدا ہوتے ہیں یا ہم انہیں پیدا کرتے ہیں؟

ہماری اجتماعی ناکامی

جب ہم ایک بچے کو اسکول سے محروم رکھتے ہیں، کیا ہم اسے چور بننے کی تربیت نہیں دے رہے؟

جب ہم ایک نوجوان کو روزگار نہیں دیتے، تو کیا ہم اسے مجرم بننے کی دعوت نہیں دے رہے؟

ظلم کی کئی شکلیں ہیں۔

ایک ظلم مزدور کو مزدوری نہ دینا ہے۔

ایک ظلم غریب کو اس کا حق نہ دینا ہے۔

اور ایک ظلم نوجوان کو اس کی صلاحیت کے مطابق موقع نہ دینا ہے۔

پھر ہم حیران ہوتے ہیں کہ جرائم کیوں بڑھ رہے ہیں۔

ہماری سڑکیں، بازار اور گھر اجتماعی ناکامی کے آئینہ دار ہیں۔

حل اور امید کی راہ

مگر اس کا مطلب ہرگز یہ نہیں کہ ہم جرائم کا دفاع کریں۔ مجرم کو سزا ملنی چاہیے کیونکہ ہر شخص اپنے اعمال کا ذمہ دار ہے۔

لیکن سوال یہ بھی ہے کہ کیا صرف فرد ہی ذمہ دار ہے؟ کیا معاشرہ اور نظام بے قصور ہیں؟

جو بچہ آج چوری کرتا ہے وہ کل کا ڈاکو بنتا ہے، جو نوجوان آج چھینا جھپٹی کرتا ہے وہ کل بڑا مجرم بنتا ہے۔

کیا ہم اس سلسلے کو روک نہیں سکتے؟

پہلا قدم انصاف کا نظام مضبوط کرنا ہے۔

دوسرا تعلیم کو ہر بچے کی پہنچ میں لانا ہے۔

تیسرا روزگار کے مواقع پیدا کرنا ہے۔

اور سب سے اہم اپنے دل میں انصاف اور ہمدردی پیدا کرنا ہے۔

جب ہم کسی غریب کو دیکھیں تو حقارت سے نہ دیکھیں۔

آئیے آج یہ عہد کریں کہ ہم نہ صرف جرم کے خلاف آواز اٹھائیں گے بلکہ ان حالات کے خلاف بھی کھڑے ہوں گے جو جرم کو جنم دیتے ہیں۔

جب انصاف سستا ہو جاتا ہے تو جرم مہنگا ہو جاتا ہے، لیکن جب امید کے دروازے بند ہو جائیں تو جرائم کے راستے کھل جاتے ہیں۔