An Overview of Pakistani Hospitals | پاکستانی ہسپتالوں کا جائزہ

اس سے قبل میں پاکستان کے مختلف شعبوں مثلاً یونیورسٹی، ٹرانسپورٹیشن ،سکلوز وغیرہ پر تفصیلی بلاگز لکھ چکا ہوں. یہ بلاگ بھی اسی سلسلے کی ایک کڑی ہے. پاکستان میں ٹرانسپورٹیشن والوں کی طرح ہسپتال والوں کا بھی پورا ایک مافیا ہے. ٹرانسپورٹ میں تو چلو صرف پرائیویٹ افراد ہی بلاواسطہ قصوروار دکھائی دیتے ہیں مگر یہاں کیا سرکاری اور کیا غیر سرکاری، دونوں ہی بہتی گنگا میں ہاتھ دھو رہے ہیں. کہنے کو تو ہسپتال ایک فلاحی ادارہ ہے، جس کا کام مریضوں کی دیکھ بھال کرنا، ان کا خیال رکھنا، انہیں بہتر سہولیات فراہم کرنا ہے مگر پاکستانی ہسپتالوں میں چند ایک کو چھوڑ کر یہ چیزیں مفقود نظر آتی ہیں. سرکاری ہسپتال کا عملہ تو یہ سوچ کر کام سے عدم توجہی برتتا ہے کہ تنخواہ مل ہی جائے گی اور پرائیویٹ ہسپتال والے پورا زور لگاتے ہیں کہ جتنا پیسہ نکال سکتے ہیں، مریض کی جیب سے نکال لیا جائے، کیونکہ یہ کاروبار کبھی ختم نہیں ہونے والا، جب تک دنیا میں مریض زندہ ہیں، تب تک پیسہ آتا رہے گا.

ڈاکٹر یا ڈاکو؟

سب سے پہلے تو شدت اور ملامت کے مستحق وہ ڈاکٹر ہیں، جو بچپن میں کبھی یہ کہا کرتے تھے کہ میں بڑا ہو کر ڈاکٹر بنوں گا اور غریب عوام کا مفت علاج کروں گا. اب ڈاکٹر بننے کے بعد حال یہ ہے کہ مریض کو صرف دیکھنے کے، علاج کرنے کے نہیں، صرف دیکھنے کی فیس کہیں 2 ہزار کہیں 3 ہزار تو کہیں 5 ہزار لگا کر بیٹھے ہیں. ایسا نہیں ہے کہ ان کے پاس کمانے کو کچھ نہیں ہے، بلکہ یہ ڈاکٹر صبح سرکاری ہسپتالوں میں جاتے ہیں. وہاں برائے نام حاضری لگا کر واپس آجاتے ہیں. پھر شام کو واپس آکر اپنا ذاتی کلینک کھولتے ہیں، بھاری بھرکم فیس لے کر تسلی سے مریض کو دیکھتے ہیں. سرکاری ہسپتال سے بھی لاکھوں کی تنخواہ بٹورتے ہیں اور اپنے کلینک سے تو بے حساب کماتے ہیں. ہسپتال میں آنے والے مریضوں کو جلدی سے نمٹا کر کہہ دیتے ہیں کہ آپ شام کو میرے کلینک پر آجائیے گا، وہاں آپ کو تسلی سے دیکھ کر علاج کروں گا. ایسے ڈاکٹر مسیحا کے بھیس میں چھپے قاتل ہوتے ہیں. بلکہ یہ ڈاکٹر ہوتے ہی نہیں ہیں، یہ ڈاکو ہوتے ہیں ڈاکو. جو لوگوں کی جیبوں پر ڈاکہ ڈالتے ہیں.

ہسپتالوں کے سہولت کار:

ڈاکو کے زمرے میں صرف ہسپتال کا عملہ نہیں آتا بلکہ ان کے وہ سب سہولت کار آتے ہیں جن کے اشتراک سے ہسپتال ایک مافیا بن جاتا ہے. پھر چاہے وہ میڈیکل سٹورز یا فارمیسی والے ہوں، یا پھر دوائی بنانے والی کمپنیاں اور ان کے وہ مالکان جو محض اپنی دوائی بیچنے کی خاطر مریض کی طبیعت کا بیڑہ غرق کر دیتے ہیں. اکثر ایسا ہوتا ہے کہ جس مخصوص ڈاکٹر نے دوائی لکھی ہوگی، وہ اسی مخصوص ڈاکٹر کے کلینک کے ساتھ موجود فارمیسی سے ملے گی. بھلا جب دوائی عام سے مرض کی ہے تو اسے بھی عام دیگر میڈیکل سٹور پر مل جانا چاہیے. لیکن نہیں. کیونکہ یہاں پر ہر ڈاکٹر نے کمپنی سے الگ کمیشن لے رکھا ہوتا ہے جس کی وجہ سے وہ صرف اسی کمپنی کی دوائی لکھ کر دیتا ہے. پھر چاہے وہ کتنی ہی مہنگی کیوں نہ ہو، چاہے مریض کی جیب پر کتنی ہی بھاری کیوں نہ ہو. بلکہ ڈاکٹر تو خوشی خوشی مہنگی دوائی ہی لکھ کر دے گا کیونکہ اگر زیادہ مہنگی دوائی لکھے گا تو زیادہ کمیشن ملے گا اور زیادہ پیسہ آئے گا. یوں یہ تماشا سر عام چلتا رہتا ہے.

اصلی مسیحا:

ہر زمانے میں ایسے لوگ ضرور پائے جاتے ہیں جن کی وجہ سے دنیا باوجود تمام تر برائیوں کے کسی قدر خوشحال دکھائی دیتی ہے. آج بھی باوجود رشوت خوری، دھونس اور فریب کے کچھ ایسے رجال کار موجود ہیں جنہیں حقیقی ہیرو کا خطاب دیا جانا چاہیے. آج بھی اسی معاشرے میں ایسے ہسپتال موجود ہیں جو مکمل علاج مفت کرتے ہیں. کسی قسم کی کوئی ناجائز فیس نہیں لیتے. ایسے ڈاکٹر موجود ہیں، جن سے بات کرکے ہی مریض کو شفا مل جاتی ہے. ایسا عملہ موجود ہے، جس کے رویہ کی بدولت ہی مریض پرسکون ہو جاتا ہے. ایسے بھی پرائیویٹ ہسپتال ہیں جہاں مناسب فیس لی جاتی ہے. لوگوں کو لوٹا نہیں جاتا. اگر یہ چند اچھے ادارے نہ ہوتے تو نہ جانے پاکستان کس حال میں ہوتا. ایسی جگہوں پر اکثر آپ کو غریبوں کا رش دیکھنے کو ملے گا. یقینی سی بات ہے کہ ہسپتال کے آپریشنل اخراجات بھی کسی سے ڈھکے چھپے نہیں ہیں. روزانہ کئی قسم کی مشینیں چلتی ہیں، ان سب اخراجات کو پورا کرنے کے لیے مخیر حضرات ایسے اداروں کے ساتھ تعاون کرتے ہیں. اب دونوں قسم کے ادارے چل تو رہے ہیں. بس فرق یہ ہے کہ ایک میں حرص و طمع زیادہ ہے تو وہ اپنی لالچ کی وجہ سے لوگوں کی جیبوں سے کھینچ کھینچ کر پیسے نکال رہا ہے اور دوسرے ادارے میں لوگ از خود آ کر پیسے جمع کروا جاتے ہیں. ایک کی نیک نامی ہوتی ہے تو دوسرے کی بدنامی.

نتیجہ:

میں اپنے تجزیہ کے نتیجے میں اس بات پر پہنچا ہوں کہ اگر حکومت اپنے سرکاری اداروں کے معاملات درست کر لے، تاکہ وہاں مریضوں کو مفت طبی امداد مل سکے تو پاکستانی عوام کے صحت کے آدھے مسائل یوں حل ہو سکتے ہیں. بصورت دیگر اگر حکومت ایسا نہیں کرتی ہے تو عوام کو چاہیے کہ وہ ایسے مہنگے ہسپتالوں کا بائیکاٹ کریں، جہاں پر ان کا مال دونوں ہاتھوں سے لوٹا جا رہا ہے. اگر عوام اکٹھے ہو کر مؤثر انداز میں بائیکاٹ کی مہم چلائیں تو ان مگرمچھوں کے منہ پر نتھ باندھ سکتے ہیں. میں تو چاہتا ہوں کہ میں اپنی آنے والی نسل کے لیے ایک ایسا خوبصورت اور خوشنما مستقبل تعمیر کروں، جسے ہمیں اپنی نسلوں کے حوالے کرتے ہوئے بھی خوشی ملے. ایک آزاد، خوشحال اور صحت مند مملکت کے ماحول میں سانس لے کر وہ پلیں بڑھیں اور ملک و قوم کی ترقی کی جستجو میں آگے سے آگے بڑھتے چلے جائیں.