A New Revolution in Technology, the Beginning of a New Era [ENG-URDU]

تغیر کا ابدی قانون

شاعر مشرق "علامہ محمد اقبال" نے اپنی کتاب "کلیات اقبال" کے حصہ "بانگ درا" میں ایک شعر لکھا ہے:

"سکوں محال ہے قدرت کے کارخانے میں
ثبات ایک تغیر کو ہے زمانے میں۔"

قارئین کرام! مذکورہ شعر میں علامہ اقبال نے زندگی کی ایک بہت بڑی حقیقت کو سمو دیا ہے کیونکہ ہم جانتے ہیں کہ وقت کا کام بدلنا ہی ہے اور اسی کے ساتھ ساتھ زندگی کے رنگ بھی بدلتے چلے جاتے ہیں۔
دیکھئے ناں! کبھی انسان پیغام رسانی کے لیے کبوتروں کو اڑاتے تھے، آج ایک کلک سے دنیا کے کونے کونے میں اپنی آواز پہنچا سکتے ہیں۔
کبھی علم سینہ بہ سینہ منتقل ہوتا تھا، اس کے لیے میلوں اور کوسوں کی مسافت طے کی جاتی تھی، آج وہ انگلیوں کی پوروں پر ہے۔

ان سب کو دیکھتے ہوئے مجھے یوں لگتا ہے کہ تیزی سے ہماری طرف بڑھتی یہ ٹیکنالوجی صرف مشینوں کا نام نہیں، یہ ہمارے خوابوں، ضرورتوں اور مستقبل کا ایک لازمی حصہ بن چکی ہے۔
خواہ ہم چاہیں یا نہ چاہیں، یہ ہمارے ارد گرد موجود ہے، ہر جگہ، ہر فرد و بشر کے ساتھ، بالکل ہماری سانس کی طرح، بالکل ہماری دھڑکن کی طرح۔۔۔

قارئین کرام! یہ ہے وہ سچ ہے جس سے آنکھ چرانا اندھیرے میں جینے کے مترادف ہے۔۔۔
بلکہ اگر آپ اجازت دیں تو میں یہ کہنے کی جسارت کروں گا کہ آج کے دور میں "قلم" سے زیادہ طاقتور "کی بورڈ" ہے، جو میلوں کا فاصلہ لمحوں میں سمیٹ کر رکھ دیتا ہے، اور ہمارے سامنے ساری دنیا کو ایک اسکرین پر لا کر رکھ دیتا ہے۔
یہ ہر دور کی سچائی اور خاص کر ہمارے زمانے کی حقیقت ہے۔!

تو کیا کریں۔۔؟
بس اتنا سمجھ لیں کہ ہم اس سے بھاگ نہیں سکتے، بچ نہیں سکتے، چھپ نہیں سکتے۔۔۔
اور بھاگیں بھی کیوں۔۔؟
ہمیں تو اسے اپنانا ہے، سمجھنا ہے، اور سنوارنا ہے، کیونکہ ٹیکنالوجی اب صرف سہولت نہیں، زندگی کی ضرورت بن چکی ہے۔

ٹیکنالوجی کا دور

قارئین کرام! اسی جدت و ٹیکنالوجی کی ایک صورت شہر قائد میں نافذ ہونے والا نیا ٹیکنالوجی سسٹم ای چالان بھی ہے۔

یہ سسٹم کیا ہے۔۔؟ کیسے کام کرتا ہے۔۔؟ اس کے کیا فوائد ہیں۔۔؟ آج ہم اسی "ای چالان" پہ بات کریں گے۔

قارئین کرام! ہم جانتے ہیں کہ شہرِ قائد کراچی، اپنی بے پناہ رونقوں میں مشہور ہے، یہاں رواں سال 2025ء میں ٹریفک مینجمنٹ کے شعبے میں ایک تاریخی قدم اٹھایا گیا، جسے ای چالان کہا جا رہا ہے، یعنی الیکٹرانک ٹریفک چالان یا جرمانہ!

اس نظام میں ایک جدید، شفاف اور خودکار ٹریفک نگرانی کا نظام متعارف کرایا گیا ہے، جو نہ صرف ٹریفک قوانین کی خلاف ورزیوں پر روایتی طریقہ کار کو بدلے گا، بلکہ شہریوں میں ذمہ دارانہ ڈرائیونگ کے کلچر کو بھی فروغ دینے کا ذریعہ بنے گا۔

ای چالان دراصل ایک جدید الیکٹرانک نظام ہے جس میں سڑکوں پر ہائی کوالٹی کیمرے نصب کیے گئے، جن کے ذریعے خودکار فلم بندی ہوگی اور ٹریفک کی خلاف ورزیوں کا پتہ لگایا جا سکے گا۔
اس نظام کی ایک خصوصیت یہ بھی ہے کہ اس میں کوشش کی گئی ہے کہ انسانی مداخلت کم سے کم ہو۔
سابقہ سسٹم اس لیے بھی بہت بوسیدہ ہو گیا ہے کہ عوام اس سے زچ ہو چکی ہے، جس میں پولیس کا پیچھے پڑنا، بلاوجہ جرمانہ لگانا، لیگل چالان کے بجائے باہمی لین دین کرنا، عوام کو ستانا وغیرہ وغیرہ، جبکہ ای چالان "چہرہ نہ دیکھنے والا" نظام ہے، جس میں ہر طرح کی بدعنوانیوں کے امکانات کو کم سے کم کیا جارہا ہے۔

ای چالان سسٹم کیسے کام کرتا ہے

اب سوال یہ پیدا ہوتا ہے کہ یہ نظام کس طرح کام کرے گا۔۔؟
تو اس حوالے سے عرض ہے کہ یہ سسٹم درج ذیل مراحل پر مشتمل ہے:

خودکار نگرانی:

سڑکوں پر نصب جدید کیمرے ڈرائیوروں کی مکمل نگرانی کریں گے:

رفتار کی حد کیا ہے۔۔؟

موٹر سائیکل سوار نے ہیلمٹ پہننا ہوا ہے یا نہیں۔۔؟

گاڑی والوں نے سیٹ بیلٹ باندھا ہوا ہے۔۔؟

کس نے ٹریفک سگنل توڑا۔۔؟

کون دوران ڈرائیونگ موبائل فون استعمال کر رہا ہے۔۔۔؟
وغیرہ وغیرہ

نیز اس جیسی دیگر خلاف ورزیاں خود بخود ریکارڈ ہوں گی، اور پھر ان کے مطابق چالان بنے گا۔

خودکار شناخت و چالان:

کسی بھی طرح کی ٹریفک قوانین کی خلاف ورزی ریکارڈ ہونے کے بعد، ANPR ٹیکنالوجی کے ذریعے گاڑی کی نمبر پلیٹ کو پڑھا جائے گا اور ڈیٹا بیس میں موجود معلومات کی مدد سے گاڑی کے رجسٹرڈ مالک کی شناخت کی جائے گی۔ اس کے فوراً بعد ایک ای چالان جاری ہو جائے گا۔

آن لائن سسٹم:

گاڑی کا مالک اپنا چالان آن لائن چیک کر سکتا ہے اور اس کی ادائیگی بھی آن لائن طریقوں سے کر سکتا ہے۔
یہاں یہ بات بھی خاص طور پر قابل ذکر ہے کہ خلاف ورزی کی صورت میں گاڑی کا رجسٹرڈ مالک ہی ذمہ دار ٹھہرایا جائے گا، چاہے وہ خود ڈرائیو کر رہا ہو یا نہ کر رہا ہو۔
اسی طریقے سے اگر اس نے گاڑی بیچ دی لیکن خریدار نے اسے اپنے نام پر رجسٹرڈ نہیں کروایا تو جس کے نام پر گاڑی ہے اسی کو ہی چالان موصول ہوگا۔

قانونی نتائج:

اگر کوئی شخص جرمانے کا بل موصول ہونے کے باوجود ادائیگی طے شدہ مدت میں نہیں کرتا تو اس کی گاڑی پر مختلف قسم کی بندشیں لگ سکتی ہیں مثلاً:

رجسٹریشن کینسل ہونا

فائل آگے ٹرانسفر نہ کر سکنا

گاڑی کو فروخت نہ کر سکنا

اور یہاں تک کہ گاڑی ضبط بھی کی جا سکتی ہے

مقاصد اور اثرات

قارئین کرام! یاد رکھیے ای چالان محض جرمانے جمع کرنے کا ایک ذریعہ نہیں، بلکہ اس کے کئی اہم مقاصد ہیں، جن میں سے چند ایک درج ذیل ہیں:

فوری و شفاف کارروائی: ٹریفک قوانین کی خلاف ورزی پر فوری اور غیر جانبدارانہ کارروائی کا عمل یقینی بنانا۔

بدعنوانی اور کرپشن کا خاتمہ: پولیس اہلکاروں اور عوام کے درمیان براہ راست رابطے کو کم کرکے رشوت، بدعنوانیوں اور جھگڑوں کے امکانات کو کم کرنا۔

حادثات میں کمی: ڈرائیورز میں احتیاط اور قوانین کی پابندی کا شعور بیدار کرکے سڑکوں کو محفوظ بنانا اور حادثات کی شرح میں نمایاں کمی لانا۔

منظم ٹریفک: شہر کی سڑکوں پر ٹریفک کے بہاؤ کو منظم اور محفوظ بنانا۔

اور اس طرح کے دیگر کئی مفید مقاصد شامل ہیں۔

قارئین کرام! ہمیں اس نئے نظام کو اپنانا ہے۔
کیسے۔۔۔؟ بڑا آسان ہے:

گاڑی کے ڈاکیومنٹس اور دستاویزات: اپنی گاڑی کی رجسٹریشن، ڈرائیونگ لائسنس، انشورنس اور دیگر متعلقہ دستاویزات ہمیشہ اپ ٹو ڈیٹ رکھیں۔ اگر گاڑی کا مالک یا پتہ تبدیل ہو جائے، تو فوری طور پر متعلقہ حکام کے پاس تازہ معلومات درج کروائیں۔

قوانین کی پابندی: ٹریفک قوانین کی پابندی کریں۔ سیٹ بیلٹ باندھنا، ہیلمٹ پہننا، اور ڈرائیونگ کے دوران موبائل فون کے استعمال سے پرہیز کرنا لازمی ہے۔

بروقت ادائیگی یا اپیل: پھر بھی اگر آپ کو ای چالان موصول ہوجائے تو اس کی بروقت ادائیگی کریں۔ اور اگر آپ کو اس پہ کوئی اعتراض ہے، تو مقررہ مدت کے اندر قانونی طور پر دعویٰ دائر کرنے کا حق حاصل ہے، بلا تاخیر اسے استعمال کریں۔

معافی کی سہولت: حکومت نے پہلی بار خلاف ورزی کرنے والے افراد کے لیے ایک خصوصی سہولت بھی رکھی ہے، آپ چالان موصول ہونے کے 10 دن کے اندر معافی کی عرضی دے کر اپنا جرمانہ معاف بھی کروا سکتے ہیں۔

ہماری مشترکہ ذمہ داری

لہٰذا مذکورہ تمام امور کی روشنی میں ہم یہ کہنے میں حق بجانب ہیں کہ کراچی میں متعارف ہونے والا ای چالان سسٹم شہر کے ٹریفک مینجمنٹ کے شعبے میں ایک مثبت اور دوررس اقدام ہے۔

اگرچہ ابتدا میں عوام کو اس کے ساتھ مطابقت پیدا کرنے میں دشواری ہو رہی ہے، تاہم طویل المدتی فوائد کے پیش نظر یہ نظام شہر کی سڑکوں کو زیادہ محفوظ، منظم اور شفاف بنانے میں کلیدی کردار ادا کرے گا، ساتھ ہی ٹریفک حادثات اور بدعنوانیوں کو بھی لگام لگائے گا۔

لیکن خوب یاد رکھیں کہ یہ کام دو طرفہ ہوگا، یعنی شہریوں اور حکام دونوں کو چاہیے کہ اسے اپنی مشترکہ ذمہ داری سمجھیں کہ ہم مل کر اس نظام کو کامیاب بنانے کے لیے تعاون کریں گے، تاکہ ہمارا شہر کراچی ایک جدید اور حادثات سے پاک شہر کی طرف اپنے سفر کا آغاز کر سکے۔